“Khud Ka Khuda Ban Ja”
Sabko pata hai,
ye zindagi aasaan nahi hoti,
khaas kar ek student ki zindagi,
jahan har subah ek nayi jung hoti hai,
aur har raat khud se hi kuch sawaal hote hain.
Kabhi lagta hai,
yahan mera apna koi nahi,
na koi dost jo samjhe,
na koi haath jo mushkil waqt mein thaam le,
na koi aisa jo kahe —
“Tu ruk ja, main hoon tere saath.”
Lekin sun…
Agar tum gir bhi gaye,
to tumhe khud hi sambhalna hoga,
kyunki har baar koi tumhe uthane nahi aayega.
Aur shayad isi liye
tumhe itna mazboot banna hai
ki ek din tum khud se keh sako —
“Mujhe kisi ke sahare ki zarurat nahi.”
Jitna kaam tum khud par karoge,
utna hi behtar tum bante jaoge.
Akela rehna seekho,
kyunki kabhi-kabhi
ek akeli zindagi mein hi
insaan apni poori duniya bana leta hai.
Tumhari tarah tumhe
koi aur nahi samajh sakta,
aur na hi tumhari jagah
koi aur tumhari zindagi jee sakta hai.
Isliye khud se kehna —
“Main kar lunga.”
Chahe duniya kahe mushkil hai,
chahe raasta kahe lamba hai,
chahe waqt kahe tum abhi taiyaar nahi…
Tum bas chalte rehna.
Khuda ne jo zindagi di hai,
use unki amanat samajhna.
Aur agar kabhi ye bharam rahe
ki koi aakar sab theek kar dega,
to us bharam ko bhi rehne dena…
Kyuki kabhi-kabhi
ek chhota sa bharosa hi
insaan ko tootne se bacha leta hai.
Lekin sabse bada bharosa
khud par rakhna.
Apni baat sunna,
magar jahan dil bhatakne lage,
wahan dimaag ko aage rakhna.
Har jagah dil se kaam nahi chalta,
kuch raaston par
dimaag hi tumhara sabse bada saathi hota hai.
Aur ek din…
shayad tumhe khud hi
apne liye khuda banna pade.
Aisa insaan,
jo tumhe tumhari tarah samjhe,
jo tumhare sapnon ko tumse zyada
serious le,
jo girne par tumhe uthaye,
aur jo tumse kahe —
“Tu kar sakta hai.”
Apna AIM ek rakho,
lekin apne sapne chhote mat rakho.
Tumhare andar bahut kuch karne ki taakat hai,
bas zarurat hai
khud ko roz thoda aur behtar banane ki.
Get Sarveshbindra’s stories in your inbox
Join Medium for free to get updates from this writer.
Aur ek challenge khud ko dena —
“Jo mujhe lagta hai main nahi kar sakta,
ek din wahi karke dikhaunga.”
Zindagi mein ek waqt aisa bhi aayega
jab tumhare paas options kam honge,
kisi ke paas jaakar help maangne ka
mauka bhi nahi hoga.
Us din…
Tumhare saath sirf tum hoge.
Isliye aaj se
khud par kaam karo.
Jo mushkil tumhare saamne hai,
use face karna seekho,
usse bhaagna nahi.
Kyuki mushkilein
tumhari zindagi khatam karne nahi aati,
woh tumhe ye sikhane aati hain
ki tum asal mein kitne mazboot ho.
Aur haan…
Yahan har kisi ko
kisi aur se farq nahi padta.
Zyadaatar log
apni hi zindagi mein busy hain.
Isliye log kya sochenge,
kaun saath dega,
kaun chhod jayega —
in sab ko thoda peeche chhod do.
Bas ek baat yaad rakho —
Tumhari zindagi tumhari hai.
Tumhara safar tumhara hai.
Tumhara sapna tumhara hai.
Aur sabse zaroori…
Tumhari tarah tumhe
koi nahi bana sakta.
To khud par bharosa rakho.
Girna pade — giro.
Rona pade — ro lo.
Thakna pade — thoda ruk jao.
Lekin haarna mat.
Kyuki ho sakta hai
aaj tum khud ko akela samajh rahe ho…
kal kisi aur ke liye
tum hi uski wajah ban jao
ki woh haar na maane.
